I LUBDAKA NGUNGSI SIWA LOKA

Kacerita daweg dumun, wenten juru boros, sane maparab I Lubdaka. Peliatne bangras, solah ne ngapak apak, akidik nenten madrue manah olas asih.

            Nuju panglong ping empat tileming kapitu, semengan ipun sampun kaalase nanging asiki nenten manggihin buron. I Lubdaka raris ngungsi alas sane pripit madurgama, irika kacingak wenten telaga toyane ening pisan tur madaging bungan tunjung manca warna. Irika I Lubdaka makasanja taler nenten wenten buron sane rauh.

            Risampune engseb suryane raris I Lubdaka ngerenggeng, ”Yeh…ene sube sanje yan mulih sinah kapetengan dijalan, aluh I macan ngebog I dewek. Melahne dini dogen sube nginep. Laut iye mongkod taru bila ageng sane mentik ring sisin telagane.

            Sampun nyaluk wengi I Lubdaka arip, metu ajerih manah ipun, yan nyeriep janten runtuh. Raris ipun ngeka naya mangde nenten arip. Daun bilane kapipik tur kaentungang ring telagane kale punika jeg marawat – rawat ikijang sane katumbak taler sawat – sawat ipun ningeh pacroet eling panak bojog mangelingin memene ane katumbak olih I Lubdaka.

            Beh…liu pesan I dewek ngae jelek di gumine. Uli jani I dewek lakar suud maboros, “keto semayan I Lubdaka.

            Antuk akeh daun bilane kapipik raris mabejud marupa lingga. Lingga makalinggih Ida Sang Hyang Siwa. Tur nenten karase saget sampun semengan, raris iye budal.

            Gelisin satua ring pondok kurenane nyanggra,” Inggih beli napi awinan wawu rauh?” I Lubdaka raris nyawis,” Adi beli tusing mulih sawireh kanti kasanje beli tusing maan buron. Jengah keneh beline, raris beli ngungsi alase sane pripit, tusing merasa saget suba sanja. Yen mulih beli jejeh kapetengan dijalan. Ditu I Lubdaka nyaritayang dewekne ring alase. Uli jani beli suud mamati – mati.

            Kaceritayang I Lubdaka sampun lingsir, tur tiben sungkan raris seda. Irika ipun kaupacara olih pianakne kanti pragat. Atman I Lubdaka malasat kaniskala rauh ring teleng marga sanga atman ipun bengong saantukan nenten uning ring genah katuju. Daweg punika rawuh Cikra Bala akeh pisan ngoros atman I Lubdaka katur ring Sang Hyang Suratma.

Raris Sang Hyang Suratma mataken, “Eh…cai atma…nyen adan caine? Ape gaen caine di merjepade? I Lubdaka raris matur sada ngejer, “ Inggih… ratu…titiang mawasta I Lubdaka, karyan titiang wantah maboros. Wawu asapunika atur I Lubdaka, Ida Sang Hyang Suratma mawacana , “ Eh…Lubdaka…yan keto solah caine, ento madan himsa karma. Ane jani taanang dosan caine, malebok dikawahe satus tiban.

Rawuh ring margi tanpesangkan rawuh Sang Sura Prasa akeh melanin I Lubdaka. Raris Cikra Bala mataken “Eh…ngudiang I Dewa melanin I Lubdaka?” Inggih Cikra Bala apang I Dewa tatas uning, titiang kanikayang olih Ida Sang Hyang Siwa mendak atman I Lubdaka. Yadiastun asapunika, Cikra Bala pageh ring suadarman raris mayang – mayang atman I Lubdaka. Irika metuyuda. Kasuen – suen kasor Cikra Bala, atman I Lubdaka kagayot olih Sang Sura Prasa kagenahang ring joli emas.

Nenten sue atman ipun sampun rawuh ring Siwa Loka katur ring Ida Sang Hyang Siwa. Sang Hyang Yama, miring indik asapunika raris gelis tangkil ring Ida Sang Hyang Siwa, irika Ida Sang Hyang Siwa nyaritayang parindikan I Lubdaka.

            Nah Dewa Sang Hyang Yama, de I Dewa salah penampen, yadiastun I Lubdaka dugas di merjepade masolah himse karma nanging, nuju panglong empat belas tileming kapitu iye suba ngelah brata anggone ngelebur dosane makejang.

Pikenoh satua ne ring baduur :

I manusa sujatine damuh sane sering lali, lali maring raga tur ring Sang Hyang Widhi, antuk laline kaliput kenehe sering paling mawastu masolah dursila.